RSS

A Bear Story

04 Apr

A Bear Story
by Joe Walksalong Sr.

Hé’tóhe hétsetseha tséto’sêhóhta’haovatsése, náxhóhta’haova na’êstse hetane.
Mó’ôhkeméhaeta’eévêháeémôhónêhevóhe. Naa némâhehéne’enánone kâsováaheho mó’ôhkene’sêhehevóhe ho’évohkôtse tsé’ôhkêho’âhénove.
Tsêhéóhe Hoxo’ôhtséo’hé’e tsé’ôhkêhestohe. Nêhéóhe móhnêxhéemôhónêhevóhe. Mó’oseeméoasetahoehevóhe. Móhna’hehevóhe kâsováaheho.
Naa táxeto tséne’éšêho’eohtsevôse éta’eoseeháo’o’enêstse vénôho’kohtsêstse, menôtse tsé’ôhkêhoe’to. Móhéva tonóéva, mó’éšeto’setonévêhanéhe tsé’ôhkêhe’šeéxâho’ta menôtse. Hénêhéóhe tósa’e tséstaametáhoevôse mó’oseeháo’oe’tóhanevótse menôtse. Móstâšeeononá’eestôhanevótse menôtse, éohkêhevoone.
Naa na’êstse néhe kâsovááhe, “Táaxa’e, nátâhéoné’âhtanôtse éóéšeéxâho’ta,” móxhehéhe. Naa móstatšêhešetáhoehéhe. Hetáhoestoto móhnâhahétanôhevóhe, kahkêse móho’nótonêšêho’etáhoo’êstse.
Naa nêhe’še móhnêhetôhevóhe néhe tsévé’ôhtsémose, “Táaxa’e, naa éto’énome néma’aatánó’e. Kahkêse tanêšetsêhe’ohtse!” móxhehéhe.
Naa móstâhómevonêhnêhéhe. Héne menôtse móstâhéoné’âhtôhenótse. Naa tséstâho’ehnêse kahkêse náhkohe móxhoehéhe. Móhnêxhóenóhta’o’toehevóhe. Tsêhéóhe móstaée’áhanomaehevóhe, he’âhtseneva móssóhponenéotsêhéhe.
Naa tséhnêhétôse na’êstse móstama’xeamâxêhéhe néhe kâsovááhe. Naa na’êstse kahkêse móstó’omemâsôhevóhe néhe náhkôhóho.
Naa móhnêhetôhevóhe hevésenóho, “Névé’momó’otse! He’kotsešêstse!”
Móxhómevonêhenêhéhe. Tsêhéóhe mó’oenomóvôhéhe heme’ko. Naa móššéxanomóvôhéhe tséstaohkemámôhevotsese véesôtse tséhvé’šepâhonoe’to héne móššéxanôhéhe. Móhnêhešêšéxanomóvôhéhe hevéesôtse.
Naa héne tsé’éenêhešeáahtómo náoseepévátsésta. Néohkêhéne’enovóneo’o heséeotséve’ho’e, éohkeéetsêhetâxovao’o. Móhno’keovóenêhestâhévone’evêhéhe, náohkêhešetano. Héne náoseepévátsésta tséxhóhta’haonéto. Naa táaxa’e nátaohkeévêhósêstanôtse, náhešetano, ka’êškóneho tseohkeéeáahtanovôtse. Hena’háanéhe tsé’éenêhešemé’êstomóhévôse ka’êškóneho.
Hahóo.

Advertisements
 
Leave a comment

Posted by on April 4, 2013 in CHEYENNE LANGUAGE

 

Tags: , , , , , , ,

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: