RSS

The Great Race by James Ant

04 Apr

Sosêkeameohtséhé’e may be Ma’méhá’e

The Great Race
by James Ant

Naa náto’sêhóhta’hano’ta évaveto hohháestôheaa’e tséhéne’enómo: hováhne tsé’ôhkeméhaahémevôsanevôse naa hotóao’o, heováestse hešêhováhne.

Naa móhno’ovêše’étanôhevóhe. Vé’kêseho móxxoonevóhtomanêhevóhe, hé’heeno naa no’e’ha. Naa móhnáno’tâhehéhe ameméohéstóva Sósêskeameohtséhé’e mó’ôhkêstóhehéhe. Tséstó’tšema’xêhestôhnóvâhévôse hováhne móhnovôhéstâhetsêhévóhe ókohke naa xamaevé’kêséhéso, tséohkepó’kâhese móhnêšenévêhevóhe tsévéstamôsanese(?). Naa kâsováahe, vo’êstané-kâsováahe, mato móhvé’hahtsêhéhe. Ta’se móhnóhonêhevóhe tsévéstamôsanese.

Névéé’êše móhnéma’eméohehevóhe tsêhéóhe Mo’ôhtávo’honáéva nóvôhéstsé-méó’o tsé’ôhkêhenove. Hene tséhmomá’oma’o’e móxhésenêhesóhanéhe tséhmomé’aahtsnávo’tomevôse hováhne.

Naa nehe kâsováahe mó’ôhkeasêstoésenâhéhe, a’ké’háso móxhéma’ôhkeenêhéhe. Naa hé’heeno mó’ôhkeáahtse’táhoehenotóhe nehe tsénovôhe’étsese Sósêskeameohtséhe’eva. Mó’ôhkeévo’enáoohehéhe Sósêskeameohtséhé’e. Mó’ôhke[vaase’háoohehéhe. Naa nehe vé’kêseho mó’ôhkeáahtse’táho’kónoeotsêhénotóhe hotoa’o (?) he’pa’one. Naa nehe ókohke móhvá’nemomáxome’hahéhe. Névéé’êše móhnéma’eohehevóhe.

Naa móxhoehevóhe nehe váotseváhetane naa hotóá’a naa heováestse hešêhováhne móhmonêhó’oehevóhe. Naa nêhéóhe móhvéstoehéhe tse’tohe éstsema’e tséohkêhestóhese, tséohkeamótanese. Móhvéstamôsanêhéhe nehe naa móhnésôhtôháhanetsevótse kâhamaxêstse móhno’oohenótse. Tatóne’eše ametanónaa’êstse mó’ôhkêsé’ho’enôhéhe na’êstse ta’tohe tséhe’oohevôse hováhne. Móhne’ôhkema’xe’éstsema’ó’êše’évêhanéhe. Móhma’xenoná’tsevo’êšenâhevóhe ne’éxanomévosêstse ho’e.

Naa mósêstó’nêšeno’kêsóhpenovôhe’héhe Sósêskeameohtséhé’e. Naa mo’e’ha móhmáxome’hahéhe naa ókohke hé’heeno naa xamaevé’kêséhéso tsésto’sêhésôhpa’xevôse móxhósêsé’ho’enôhéhe tséhmé’eméohevôse hene kâhamaxe. Móxhósema’xeamemée’tovanôheéhe Sósêskameohtséhé’e. Mó’amemo’kona’ôhéhe mo’e’ha. Móhne’ó’omenoohta’óhenotóhe, naa nehe ókohke. Naa mónêxhósetáhoehenotóhe nehe hé’heeno he’pa’one Sósêskeameohtséhe’eva. Móxhóseévo’enáotsêhéhe. Nêhe’še móhnêxxaená’tseohehéhe. Móhne’évâhóseasêta’xêhéhe. Móhná’tseohtsêhéhe tséstó’šêhésôhpa’xevôse. Mo’e’ha mó’ovóesóhpa’ôhéhe. Móhmo’kona’ôhéhe naa nêhe’še ókohke naa xamaevé’kêséhéso. Naa tséhne’éše’áva’otsêse móhnoose’háoohéhenotóhe hé’heeno. Naa móhnêhešêhó’tâhevâhevóhe.

Mó’ôhkeméhaamévôsanêhevóhe tósa’e tséhma’xevéenovetse mó’ôhkema’xêho’héna’senêhevóhe netao’o hováhne. Mó’ôhkemévôsanêhevóhe. Naa móhnêhešêhó’tâhévâhevóhe vé’kêseho. Mo’e’ha móhvé’šêhó’tâheváhtovêhanéhe (?[), naa ókohke naa xamaevé’kêséhéso naa hé’heeno naa éstsema’e tsé’ôhkêhe’kano heše’ke kâhamaxe mó’ôhkemâhee’éstsema’ó’êše’évêhanetséhe tséxhe’oohevôse (?x).

é’ôhkêhetóhta’haneo’o (?) ma’háhkêseho évaveto, hene tsé’évâhešeamâhéstove ametanénestôtse, tsé’évâhó’tâhevá’tôsanêse mo’e’ha naa ókohke naa xamaevé’késo hé’heeno naa éstsema’e. Naa móhnêhehevóhe totaeto nehe hováhne, “Naa néévâhó’tâhemeno. Néévâhó’tâhnóvo Sósêskeameohtséhé’e. Nêstseohkeévamévemeno,” éxhésesto hováhne. “Néohkeméhaamévatsemeno naa mé’tó’e hápó’e nêstseévaememévemeno tséhe’éševo’êstanéhévése,” éxhésesto nehe hováhne. Naa nêhe’xóvéva móhkeévamévêhevóhe.

Naa móxoto (móxheto? móxôheto?) hoohtsêstse tósa’e móhmámeevêšenâhéhe. Hotómá’e nêhéóhe mó’ôhkêhoehevóhe vo’êstaneo’o tséhósêhestôheéšeevôse. Hováhne, váotseváhne naa mo’ehe, hotóao’o, heováestse hešêhováhne mó’ôhkêhó’eaxaehevóhe nêheno nehe ma’xêhoohtsêstse tsé’evešêse.

Naa mó’ôhkepó’poe’óvôhevovóhe nehe mó’ôhkêhóe’âhéotsêhevóhe nehe vo’êstaneo’o. Háá’êše ôhtaéšêho’o’âhéotsévosêstse mó’ôhkeá’eotsé’toehevovóhe. Na’êstse mâhtamâháahe Sósêkeameohtséhé’e mó’ôhkêhestóhehéhe, mó’ôhkevovóe’âhéotsêhéhe. Naa móhne’ôhkeévavóhka’xêhéhe. Mó’ôhkeévaasêta’xêhéhe nêhéóhe ma’xêhoóhtsetseva. Móhvéhpâhehéhe nehe ma’xêhoohtsêstse. Naa nêhe’še tsétâhetaa’hóe’âhéotsevôse mó’ôhkemâhena’haehevovóhe hováhne, hotoa’o(?a), heováestse hešêhováhne nêhéóhe tséhó’eaxáetsese (?[). Naa móhenêséhanéhe tséohkeévâh[pesemévévôse hováhne tséxhó’tâhevá’tôsanevôse nehe mo’e’ha, ókohke, xamaevé’késo, naa hé’heeno, naa éstsema’e.

Hea’a henese.

Advertisements
 
Leave a comment

Posted by on April 4, 2013 in CHEYENNE LANGUAGE

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: